KTP General Conf. hlabu tlangzarh

Dec. 5 chawhma dar 9:00 khan KTP General Conference vawi 54-na, Thenzawla March 1-4, 2012 chhunga neih tur Hlabu tlangzarhna leh Pathian hnena hlanna inkhawm chu Synod Bookroom tual zawlah neih a ni. He inkhawm hi Pu Vanlalfinga, Finance Secretary, CKTP-in a kaihruai a, Hlabu tlangzarhna leh Pathian hnena hlanna hun hi Rev. Zosangliana Colney, Executive Secretary i/c KTP-in a hmang a ni. He hlabuah hian Branch hrang hrang atanga thawh khawm leh a buaipuituten an thlan khawm hlate zinga hla tha thlan chhuahte dah a ni.

Hla 93 vawm khawm atangin 29 thlan chhuah a ni a, kum 2010 Hlabu atangin 11 chhawm luh leh a nih bakah Mizo Lengkhawm hla 10 dah belhin a vaiin hla 50 a awm a ni. Hlabu kawm design siam tura sawmna chhangin mi 17-in an thehlut a, chung zingah chuan Tv Lalhriatzuala, Khatla South design chu thlan a ni. Kum danga tih ngai loh dan takin a chhung hi rawng chi hniha ziak a ni.

Hlabu hi copy 40000 siam a ni a, copy 35000 hi a kawm pangngai a ni a, Rs.20 man a ni. Copy 5000 hi spiral binding an ni a,  Rs.30 man a ni. Hlabu hi Synod Bookroom-ah zawrh a ni. Hlabu tlangzarh inkhawm neih zawh atang hian Synod Bookroom atangin hralh chhuah nghal a ni.

Source : Mizoramsynod.org